Mga empleyado san gobyerrno probinsyal, ginpailarom sa mandatory drug test


- Date Posted: January 23, 2017


Catarman N. Samar– Iginpailarom sa mandatory drug test an ngatanan nga mga empleyado san gobyerno probinsyal yana nga adlaw Enero 23, 2017.

An drug test in ginpatuman san mga personahe san Philippine Drug Enforcement Agency o PDEA Regional Office 8 nga an buhatan nahimumutang sa syudad san Tacloban.  Mayaon 10 ka-miyembro an PDEA team sa pagpamuno ni Joe Louis Gajutos an istrikto nga nagkondukto san surprise drug test sa mga empleyado san probinsya.

Nagpahayag si Mr. Rei Josiah Echano, provincial information officer, “This is walking the talk of the Governor’s policies on illegal drugs that had come up since the first Anti-Drugs Summit in 2014.  At the same time, this is in support of the National Government’s efforts to get rid of illegal drugs in our country.”

An pitad in kaparte san programa san gobyerno probinsyal nga pagpatuman san Drug-Free Provincial Government of Northern Samar.  Ini in nahisusulod san Executive Order No. 001-06-2016 nga ginpagawas ni Gobernador Jose Ong Jr. san Hunyo 28, 2016.   Ginmamando san mao nga EO  an drug test san ngatanan nga mga empleyado san gobyerno probinsyal agud masiguro an healthy ngan drug-free working environment.  Katuyuanan lat sini nga pudngan an pagsulod san illegal nga droga ngan paggamit sini sa trabaho.

Sa ilarom san mao nga direktiba san gobernador, an dire magsumite sa mandatory drug test in papaesplikaron ngan tatagan sin kaangayan nga penalidad o administrative sanction.

An resulta san drug test in igpapasa san PDEA sa pamunuan san probinsya nga mao naman an magpapahibaro sa mga natutungdan.  Subay pa san guidelines san gobernador, an magpositibo sa test in igpapailarom sa guidance counseling ngan monitoring pero an mga chronic user o drug dependent in igpapailarom sa mandatory drug rehabilitation.

Naipatuman an mandatory drug testing pinaagi san pakigsumpayan san administrasyon ni Gob. Ong sa PDEA nga mao naman an otorisado san gobyerno para magkondukto sini.