Norte san Samar, nakakarawat sin 25 milyones ka pesos sa ilarum san SAAD san DA


- Date Posted: January 25, 2017


Catarman, Northern Samar – Nakakarawat sin kantidad 25 milyones ka pesos an probinsiya san Norte san Samar para san pagpatuman san magkalain-lain nga proyekto sa agrikultura sa ilarum san Special Areas for Agricultural Development o SAAD san Department of Agriculture (DA).

Personal nga ginkarawat ni Gob. Jose Ong Jr. an tseke kan DA Assistant Secretary for Planning and Special Projects Secretary Lerey Panes sa Enero 16, 2017 didto sa siyudad san Tacloban.  An nasabi nga kantidad in siyahan nga release para sa tuig 2016. Sa tuig 2017, an pangkabug-uson nga siyen milyones ka pesos an ighahatag sa probinsiya. Mao ini an impormasyon nga nahibaroan kan Engr. Romeo Cardenas, provincial planning and development coordinator.

Dugang pa ni Cardenas, an nasabi nga kantidad in gagamiton sa pagpatuman san mga proyekto sa upat nga gintutdo nga priority areas sugad san production enhancement o pagpakaupay san produksyon sa paray, mais, paghayupan ngan pagmanukan, ngan high-valued crops.

An nasabi nga programa san administrasyon ni Presidente Duterte in nagtutumuyo nga mabuligan an ten poorest provinces sa nasud nga maibanan sin 25% an poverty incidence sini. Ginlalauman nga pinaagi san SAAD, maghahamubo an poverty incidence san Norte san Samar tikang sa 56.2% ngadto sa 33% sa tuig 2022.

Kaapi liwat sini nga SAAD mao an mga probinsiya san Lanao del Sur, Eastern Samar, Apayao, Maguindanao, Zamboanga del Norte, Sarangani, North Cotabato, Negros Oriental, ngan Western Samar.