2016 Retirees san Gobyerno Probinsyal, gintagan pasidungog


- Date Posted: February 3, 2017


Catarman, Northern Samar – 18 nga mga dati nga empleyado o retiree san Gobyerno Probinsiyal san Norte san Samar san tuig 2016 an gintagan sin pagkilala san administrasyon ni Gob. Jose Ong Jr., kanina sa aga, Pebrero 2, 2017 didto sa Governor’s Conference Room pinaagi sin simple pero mahinungdanon nga seremonyas nga gintawag nga Service Award for 2016 Retirees nga mayaon sin tema nga ‘A tribute to a lifetime of service excellence’.

An mga retirado nakakarawat sin cash award ngan plake tikang sa gobyerno probinsiyal para san ira maupay nga pagserbisyo ngan dedikasyon sa  trabaho. Adton mga nag-retire sa compulsory age nga  65 anyos gintagan sin kinse mil pesos samtang adton nag-retire sa edad nga 60-64 anyos gintagan naman sin diyes mil pesos. Si Leonardo Olitan, nagserbe komo dati nga security guard sa San Antonio District Hospital an may pinakamaiha nga serbisyo nga nag-abot sa 41 years.

Segun kan Jocelyn Addun, provincial human resource management and development officer nga an Service Award mao nga kaparte san Program on Awards and Incentive for Service Excellence (PRAISE) diin nagtutumuyo nga marekognisar an kontribusyon ngan serbisyo san mga retirado.

Sa mensahe ni provincial director Pharida Aurelia, bag-o pala nga nag-asumer nga  hepe san Civil Service Commission dinhi sa Norte san Samar, nagsugad ini nga  nalilipay siya nga maimdan an mga retirado nga nakaabot sa pangidaron nga 65-anyos ngan 41-anyos nga pagserbisyo sa gobyerno probinsiyal. Dugang pa ni director Aurelia nga an Norte san Samar in nangunguna sa mga local government units (LGUs) sa Rehiyon 08 pag-abot sa mga inisyatibo sa pagpakaupay san human resource (HR).

Ginrekognisar naman ni Gob. Jose Ong Jr. sa iya mensahe, an importansiya san suporta san mga empleyado sa pagpatuman san mga programa ngan sistema san gobyerno probinsiyal.  Dugang pa ni Gob. Ong nga maski nano kaupay  an mga programa san gobyerno, kawang la ini kun waray sin suporta ngan kooperasyon an mga empleyado ug sugad man ginpaabot niya an mapaso nga pagpasalamat ngadto sa mga retirado san gobyerno probinsiyal.

Komo baton, naghatag naman sin mensahe an mga retiree nga sira Nery Maceda san Provincial Livelihood and Development Office, Annie Espiña san GB Tan Memorial Hospital, ngan Eduardo Ladeza san Provincial Population Office ngan nagpahayag sira sin kalipay nga nakakarawat sira sin sugad sini nga dungog diin gintagan sin importansiya an ira serbisyo.  Naglalaum sira nga magpadayon ini nga programa san gobyerno probinsiyal.

Sa closing remarks ni Atty. Efren Sabong, provincial administrator,  gin-aghat niya an mga retiree nga magin physically and mentally fit ngan maghatag sin de-kalidad nga panahon sa ira mga kabataan. Dugang pa ni Sabong, nga an retirement in diri katapusan kundi sayo la ini nga tinikangan.