PPOC Nagpasar Resolusyon nga Ipadayon an Peacetalk san Gobyerno ngan NDF


- Date Posted: February 13, 2017


Catarman Northern Samar– Naging manilampuson an ginbuhat nga Provincial Peace and Order Council and Stakeholder Fellowship didto sa Governors Residence sa Bgy. Dalakit, Catarman N. Samar sa nilabay nga adlaw Pebrero 08, 2017.

Gin adaptar san mga miyembro san PPOC an suhesyon ni Congressman Raul A. Daza sa primero distrito nga magpasar resolusyon para igduso an pagpadayon san peace negotiations sa giotan san gobyerno ngan Communist Party of the Philippines, Nerw Peoples Army, National Democtratic Front o CPP/NPA-NDF.

Igbubutang an nasabi nga resolusyon sa mantalaan o diyaryo para ipakita nga an nortehanon peace loving people ngan nadiri san bisan nano nga kasamukan ug ini permado sa ngatanan na mga municipal mayors sa probinsya.

Ginkalipay ni Governor Jose Ong Jr, an presinsya sa mga nagtambong san Provincial Peace and Order Council and Stakeholders Fellowship kay mao ini an kanya hingyap an padayon nga kamurayawan sa bug-os nga norte san samar para sa madagmit nga pag-asenso sa aton probinsya.

Gintambungan an okasyon nira Governor Jose Ong Jr. Congressman Raul A. Daza, Vice Governor Gary M. Lavin, miyembro san Hunta Probinsyal, Municipal Mayors, PNP Regional Director Elmer Beltejar, M/General Raul M. Farnacio-Comdr, 8ID PA, Provincial Director P/SSUPT Ceasar Zafiro Tannagan, B/General Mario Lacurom, DILG Provincial Director Valentine Bajet, Rev. Father Fred Placa, Regioanl Trial Court Judge Norma Cardenas, Provincial Prosecutor Rosario Diaz, OPPAP Area Manager for Eastern Visayas Ms. Emie Bonifacio, PPOC Stakeholders ngan durodilain nga ahensya san gobyerno denhi sa probinsya.

Nahuman an programa pinaagi san Pledge and Commitment Signing for Peace and Development san ngatanan nga mga bisita ngan partisipantes ug ginsundan sin Fellowship Dinner an nasabi nga okasyon didto manta sag Governors Residence sa Bgy. Dalakit, Catarman Northern Samar.