Unom nga mga former rebel, nakakarawat sin cash assistance tikang sa gobyerno


- Date Posted: November 14, 2017


Catarman, Northern Samar – Manilampuson nga ginbuhat an distribusyon o panhatag sin asistensiya sa unom nga dati nga mga rebelde o former rebel pinaagi san simple nga programa nga ginbuhat kanina sa aga, Nobyembre 8, 2017 didto sa Governor’s Conference Room.

An unom nga mga resipyente in nakakawarat sin kabug-usan nga kantidad P807,000.00 tikang sa gobyerno nasyunal pinaagi san Comprehensive Local Integration Program (CLIP) nga gindudumara san Department of the Interior and Local Government (DILG) ngan Local Social Integration Program (LSIP) san gobyerno probinsiyal sa ilarum san pamumuno ni Gob. Jose L. Ong Jr. An mga asistensiya mao an immediate assistance, livelihood assistance ngan firearms remuneration. Lain san cash assistance gintagan liwat sin sayo kasako nga bugas, food packs ngan hygiene kits an mga resipyente.

Sa welcome remarks ni Jenny Darish, acting Provincial Social Welfare and Development Officer nagpasalamat ini sa mga resipyente ngan kanya ginlalauman nga magamit sin tama an cash assistance nga ginhatag sa ira san gobyerno. Sugad pa niya, mayaon sin 186 former rebel an nakatagamtam sin asistensiya tikang san tuig 2011.

Dako naman an pagpasalamat san sayo nga former rebel nga nagrepresentar sa ira grupo ngan nagpatapod ini nga gagamiton sin tama an asistensiya nga ginhatag sa ira sugad sa pagpaeskwela san iya mga kabataan. Dugang pa niya, seryoso siya nga mabulig sa gobyerno nga mapuypoy an insurhensiya dinhi sa probinsya.

Nagpahayag naman sin pagpasalamat si LTC Miguel Ceballos san 8th Infantry Division nga nagrepresentar kan Major General Raul Farnacio sa pagbalik-loob san mga dati nga rebelde ug sugad man sa gobyerno probinsiyal ngan DILG sa malaksi sini nga pagpadangat sin asistensiya. Sa mensahe ni Vice Governor Gary Lavin, nagpasalamat siya nga nahibaroan niya an ungod nga sitwasyon sa bawbaw ngan an pakigsayo sa gobyerno san mga former rebel. Sugad man, iya ginbasa an mensahe ni Governor Ong nga nasugad nga sayo ini nga importante nga mensahe sa aton mga kabugtuan nga bayaan na an pakigios gamit an armas ngan bumalik na sa mamurayaw nga kinabuhi. Dugang pa san mensahe ni Governor Ong, malipayon siya nga hinay-hinay nga nagkakayaon sin kapulsanan an nasabi nga programa tungod kay mayaon na sin mga kasangkayan nga natagan sin benepisyo san ilarum sini. Ginpaabot liwat niya an mapaso nga pagsaludar kanda Major General Farnacio ngan Brigadier General Mario Lacurom sa ira panalimbasog sa pagpatuman san nasabi nga programa.

An panhatag san asistensiya in ginpangunahan ni Vice Governor Gary Lavin, LTC Miguel Ceballos san 8th Infantry Division nga nagrepresentar kan Major General Raul Farnacio kaupod sira BGen Mario Lacurom san 803rd Brigade, DILG Provincial Director Valente Bajet, Rev. Father Fred Placa, Police Supt. Neil Montano san Philippine National Police (PNP), Ms. Maricel Bantilo san Office of the Presidential Adviser on the Peace Process (OPAPP), ngan Jenny Darish san Provincial Social Welfare and Development Office (PSWDO).