Konstruksyon san Simora Road, pagtitikangan na


- Date Posted: May 31, 2018


Catarman N. Samar – Nakatalaan paghimuon yana nga adlaw an groundbreaking san konstruksyon san Samar Pacific Coastal Road o mas kilala sa tawag nga Simora Road sa Bgy. Simora, Palapag, Northern Samar.

Ini an nahibaroan kan Undersecretary Emil Sadain san Department of Public Works and Highways sa surat nga kanya ginpaabot sa probinsya.

An paghihimuon nga sigad in may kahilaba nga 11.607 km. two-lane concrete pavement kaupod in 3 nga tulay nga mao an: Simora Bridge (L=161.00m), Jangtud 1 Bridge (L=31.00 m) and Jangtud 2 Bridge (L=69.00 m).  An proyekto in ginpondohan san gobyerno san Korea sa ilarom san Korea Export – Import Bank, Economic Development Cooperation Fund Loan, ngan san gobyerno nasyunal san Pilipinas.

An kabug-usan nga proyekto in nagkakantidad sin P997.5 million ngan targeted nga matapos sa Marso 2020.

Durante san programa sa groundbreaking, maghahatag sin mensahe si Gobernador Jun Ong, ngan an project briefing naman ni Director Sharif Madsmo Hasim san DPWH Unified Project Management Office.

Magigin pangunahon nga bisita sa seremonya  an Korean Ambassador to the Philippines nga si Han Dong-Man, ngan DPWH Secretary Mark Villar.

An proyekto in ginkokonsidera nga “strategic” tungod kay magkokonekta ini san mga bungto san Norte ngan Este san Samar, ngan magkukumpleto  san Samar Island Circumferential Road.

Nagpahayag pa si Gob. Ong nga dako an bulig san proyekto sa pag-uswag san agrikultura ngan fishery sector san probinsya.  Sa kabug-usan, ginkikita ini niya nga makaiban san kakurian san Norte san Samar. Kanya liwat ginpasalamatan si Pres. Rodrigo Duterte ngan DPWH Secretary Villar para san kanra paningkamot nga mapondohan ini nga maiha na nga inop san mga Nortehanon, labihan na san mga taga-Pasipiko na mga bungto san probinsya.