Catarman, Northern Samar – Nakab-ot  san Provincial Government of Northern Samar (PGNS) an pagigin Program to Institutionalize Meritocracy on Human Resource Management (PRIME-HRM) Maturity Level 2 Compliant sa bug-os nga Rehiyon 08 durante san  ginbuhat nga on-site assessment san Civil Service Commission (CSC) Regional Office 08 san Oktubre 18-19, 2018 nga gintambungan san mga department heads ngan rank and file employees san nasabi nga buhatan. Mao ini an nahibaroan kan Jocelyn Addun, hepe san Provincial Human Resource and Development Office (PHRMDO) san gobyerno probinsiyal.

          Segun kan Addun, an PGNS pala an siyahan nga provincial local government unit (PLGU) sa bug-os nga Rehiyon 08 an nakakuha san nasabi nga pagkilala  diin gin-imdan san CSC ini pinaagi  sin tulo nga lente o lens  nga mao an systems lens o ‘show me’ part san assessment, practices lens, ngan competencies lens.  Pira liwat san PRIME-HRM indicators nga gin-assess san CSC mao Recruitment Selection and Placement, Learning and Development, Performance Management, ngan Rewards and Recognition.

           Komo maturity level 2 compliant, hugot nga ginpapatuman san PGNS an equal employment opportunity principles o EEOP kaparte san recruitment, selection and placement ngan iba pa nga aspeto san human resources (HR)  magin nano man an race, gender, religious affiliation sin sayo nga indibidwal kaapi adton person with disabilities (PWD) .

          Kon mahinunumduman, una na nga nagkarawat sin pasidungog an PGNS tumikang sa CSC yana pala nga tuig didto sa Cebu City sa pagkakapili sini komo 2018 Best Non-Competency Based Merit Selection Plan.

          Bahin sini, nagpapaabot sin pagpasalamat si Gob. Jose Ong Jr. sa mga department heads ngan mga empleyado nga nagbulig agud makab-ot san PGNS an nasabi nga pagkilala ngan sa CSC evaluators nga mao sira Ms. Lucille Lepasana ngan Ms. Maria Victoria Arevalo.

          An PGNS in nakatalaan nga magkarawat sin pagkilala komo PRIME-HR Maturity Level 2 Compliant yana nga Miyerkules, Oktubre 24, 2018 didto sa Summit Hotel sa siyudad san Tacloban.