Catarman, Northern Samar – An Gobyerno Probinsyal san Norte san Samar sa ilarum san pamumuno ni Governor Jose Ong Jr. in naghatag sin pasidungog ngan paghinumdum sa  pinakauna nga naelehir nga  gobernador san probinsya san Norte san Samar nga si Governor Irene Arcinas-Balite para san iya ika-100 nga kaadlawan o centennial birthday  san naglabay nga  Oktubre 19, 2018  didto sa Lobby san Kapitolyo pinaagi sin misa ngan programa.

        An selebrasyon in gintikangan sin misa sa alas 9:00 sa aga ngan ginsundan sin programa diin si former governor Madeleine Mendoza-Ong  an naghatag sin welcome ngan ginsundan sin pag-unveil san rebulto o bust ni Governor Irene Balite. Naghatag liwat sin mensahe sira Ms. Susan Hernandez, dati nga staff ni Governor Balite, Engr. Jose “Nonoy” Balite III nga mao an nagrepresentar sa pamilya san Balite, ngan Governor Ong.

             Iginpakita  an pira san makolor nga pahina san kinabuhi ni  Governor Balite  pinaagi sin photo exhibit.

          Si Governor Balite in naelehir nga siyahan nga gobernador san Norte san Samar san Nobyembre 1967 ngan nagserbe tikang san Pebrero 2, 1968 ngadto san Disyembre 31, 1971 kahuman nga madibider an Isla san Samar sa tulo nga probinsiya pinaagi san Akta Republika Numerado 4221.

          Durante san iya termino komo gobernador, an iba pa nga pioneering provincial officials mao sira Atty. Pablo G. Rebadulla komo bise gobernador ngan tulo nga board members nga sira Atty. Guido A. Lavin, Atty. Edilberto A. del Valle ngan Atty. Sixto T. Balanquit.

          Si Governor Balite in una nga nagkanhi sa probinsya komo pharmacist ngan nagtindog san pinakauna nga parmasya sa Catarman san tuig 1947.  Nahuman niya an iya kurso sa Manila Central University san tuig 1946.

          Napangasawa ni Governor Balite si Congressman Eladio T. Balite ngan mayaon sira sin upat nga anak nga sira Leticia, Jose, Magdalena, ngan Ramon.

          Si Balite in ginpanganak sadto nga  Oktubre 20, 1918 sa San Ildefonso, Bulacan ngan nagdako sa Cabanatuan, Nueva Ecija.

           Namatay si Gov. Balite sa edad nga 71 sadton Pebrero 12, 1990 didto sa syudad san Manila.