Catarman, Northern Samar – Nakatalaan paghimuon an payout san insentibo san mga resipyente san Iskolar ng Probinsya para sa second semester san 2017-2018 sa maabot nga Nobyembre 22-23, 2018 didto sa Kapitolyo. Mao ini an impormasyon nga ginpadangat ni Mr. Rey Palop, provincial coordinator san Iskolar ng Probinsya.

           An panhatag sin insentibo in magtitikang sa alas 8:00 sa aga ngadto sa alas 5:00 sa kulop san Nobyembre 22, 2018 para san mga iskolar san Primero Distrito san Norte san Samar ngan Nobyembre 23, 2018 sa mao manta nga oras para sa Segundo Distrito ngan diri sini api an mga bungto san Catubig ngan Las Navas tungod kay mayaon sin gintalaan nga iskedyul para sa ira,

           Ginpapahinumdum an mga iskolar nga dad-on an ira mga school ID para sa pagkarawat san ira insentibo.

          An programa nga Iskolar ng Probinsya sa ilarum san pamumuno ni Gob. Jose Ong Jr. in nagtutumuyo nga matagan sin asistensiya adton mga estudyante nga kablas nga makapag-eskwela sa kolehiyo pinaagi sin paghatag insentibo nga P2,500.00 sa kada semestre pinaagi san mga ordinansa numerado 19 ngan 20 series of 2013 nga ginpasar san Sangguniang Panlalawigan nga ginpapangunahan ni Vice Gov. Gary Lavin.