Iginhatag na sa mga child development workers (CDWs) o dati kilala sa tawag nga daycare workers, an kanira insentibo tikang sa gobyerno probinsyal para san tuig 2018. 

An mao nga insentibo in gin-release durante san Child Development Workers Assembly sa Kapitolyo san Marso 28, 2019.  Masobra 300 nga mga CDWs tikang sa iba-iba nga bungto an nag-atendir san mao nga katitirok.

Ini an siyahan nga higayon nga naghatag an gobyerno probinsyal sin insentibo sa mga CDWs sa bug-os nga probinsya kahuman nga magpasar an Sangguniang Panlalawigan o SP sin ordinansa nga nag-ootorisar san paghatag sin insentibo sa mga CDWs komo counterpart san probinsya sa insentibo nga ginhahatag san mga munisipyo ngan barangay sa kanra tagsa nga CDWs.  An ordinansa in gin-isponsoran ni Board member Gina Silvano, an chair san Committee on Health and Social Services, ngan gin-suportahan san mga myembro san SP ug san presente nga gobernador.

Kon manunumduman, ginhangyo san mga daycare workers kan Gobernador Jose Ong Jr. san naglabay nga tuig sa kapareho nga katitirok, nga tagan man sira sin insentibo san probinsya para san kanira serbisyo pagtutdo san mga kabataan 2-4 years old sa mga barangay daycare centers.

Gin-atendiran an Child Development Workers Assembly sini pala nga Marso nira board members Silvano, Fawa Batula, Albert Lucero, Neil Hernandez ngan Joma Vicario komo representasyon san pamunuan ni Gobernador Ong ngan Bise Gobernador Gary Lavin.

Ginpadangat naman san early childhood care and development o ECCD program coordinator nga si Gina Magdaraog ngan mao liwat an nagrepresentar kan provincial social welfare and development officer Jenny Darish an mga nakalinya nga aktibidades sa ilarom san programa para sa tuig 2019.  Ginreport liwat niya an mga nagin accomplishments san programa san nakaagi nga tuig 2018.

Sa mao liwat nga okasyon, nanumpa an mga bag-o nga elihido nga opisyales san Provincial Federation of CDWs ngan Provincial Association of ECCD coordinators sa atubangan san mga kaapi san organisasyon ngan mga bisita.  Si Board Member Silvano an nagserbe nga administering officer.  

Ginpresentar pa san presidente san Provincial CDWs Federation nga si Teresita Ganaden an updates san grupo ngan ni treasurer Emma Turla an kamutangan sa pananalapi san pederasyon.

An asembliya in gin-organisar san gobyerno probinsyal pinaagi san Provincial Social Welfare and Development Office o PSWDO komo suporta san programa sa ECCD.